Ég fékk smakk af súkkulaði sem heitir SÖLVA Chocolates og vá hvað ég varð heilluð. Þetta er virkilega gott súkkulaði og skemmtilegt að segja frá því að SÖLVA Chocolates er eina íslenska súkkulaðifyrirtækið sem er 100% lífrænt.


Sveinn Ólafur sem er einn af eigendum SÖLVA Chocolates er mágur minn og hef ég verið að fylgjast með þeim hanna og þróa þetta ótrúlega ljúffenga súkkulaði. Það er því kominn tími á að fleiri fá að vita meira um þetta ég tók smá viðtal við þau í tilefni af því.

Hverjir eiga fyrirtækið? 
SÖLVA Chocolates er í eigu fimm einstaklinga sem útskrifuðust frá Verzlunarskóla Íslands síðastliðið vor. Það eru þau Áshildur Friðriksdóttir, Jórunn María Þorsteinsdóttir, Lára Borg Lárusdóttir, Sveinn Ólafur Lúðvíksson og Unnur Svala Vilhjálmsdóttir.

Hvenær byrjaði þessi hugmynd og afhverju ? 
Hugmyndin kom í frumkvöðlaáfanga í Verzló í janúar fyrir ári. Við áttum að stofna fyrirtæki og koma með vöru og selja hana. Við vildum koma með vöru sem myndi ná til sem flestra og þá kom hugmyndin að gera súkkulaði, enda elska allir súkkulaði. Áfanginn var hluti af keppni á milli framhaldsskólanna sem var á vegum Ungra frumkvöðla; Junior Achievement. Við sigruðum þá keppni og kepptum fyrir hönd Íslands í Evrópukeppni Junior Achievement sem var haldin í Sviss og unnum þar Social Medi verðlaunin fyrir að vera vinsælasta teymið á samfélagsmiðlum. Síðan komumst við inn í Startup Reykjavík í sumar þar sem við lærðum gríðarlega mikið og var það mikill stökkpallur fyrir okkur þar sem við fengum fjárfestingu frá Arion Banka og ómetanlega leiðsögn frá áhrifamiklu fólki í atvinnulífinu.

Hvað gerir SÖLVA Chocolates sérstakt ? 
Það sem gerir súkkulaðið frá SÖLVA Chocolates frábrugðið öðru súkkulaði er að það er unnið beint frá bauninni. Við flytjum inn kakóbaunir frá Tanzaníu frá fyrirtæki sem heitir Kakoa kamili en það einbeitir sér að samfélagslegri uppbygginu þar í landi og fer hluti af hagnaðinum í að byggja upp skóla, spítala og munaðarleysingjahæli í Tanzaníu. Öll hráefnin okkar eru fair trade og 100% lífræn, sem gerir SÖLVA Chocolates eina Íslenska súkkulaðifyrirtækið sem er 100% lífrænt. Við leggjum mikla áherslu á útlitið bæði á súkkulaðinu sjálfu og pakkningunum. Við skreytum súkkulaðið sjálft með hvítum kakósmjörslitum og pökkum því síðan inn í litríkar pakkningar.

Hvaða bragðtegundir eru í boði ? 
Eins og er erum við með fimm bragðtegundir; hvítt súkkulaði með vanillu og kakónibbum, mjólkursúkkulaði með lakkríssalti, mjólkursúkkulaði með saltkaramellu, hreint 70% súkkulaði og 70% súkkulaði með þurrkuðum hindberjum.

Hvar getur maður pantað eða keypt súkkulaðið?
Við erum nýkomin í verslanir en súkkulaðið kom í búðir 23. desember síðastliðin. Á heimasíðunni okkar www.solvachocolates.com er hægt að sjá lista yfir allar þær verslanir sem selja SÖLVA Chocolates og erum við að vinna í því að koma upp vefverslun á heimasíðunni.

Er eitthvað á döfinni?
Við erum hægt og rólega að koma okkur fyrir í fleiri verslunum og verðum komin á fullt fyrir sumarið.

SÖLVA Chocolates er hægt að fá bæði á netinu og í þessum verslunum:
Borðið – Ægisíðu 123, 107 Reykjavík
Búrið – Grandagarður 35
Blómasmiðjan – Efstaland 26
Islandia – Kringlan
Islandia – Bankastræti 2
MAIA – Laugavegur 7
Litla Garðbúðin – Höfðabakki 3
Sjafnarblóm – Austurvegur 21 (Selfoss)
Systrasamlagið – Suðurströnd 10
Radisson BLU Hótel Saga – Hagatorgi
Iceland Travel Assistance, Austurstræti 17
BSÍ, Umferðarmiðstöðin – Vatnsmýrarvegi 10

Súkkulaði sem þú verður bara að smakka!

Katrín Sif

Katrín Sif er hárgreiðslukona og einn af eigendum Sprey Hárstofu. Jákvæðni lýsir henni best og hún hefur áhuga á öllu sem tengist hári og tísku. Snap: spreyharstofa

Alpha girls